नगर शहरात एक खळबळजनक असा प्रकार शहरातील फकीरवाडा परिसरात समोर आलेला असून आगामी निवडणुकीच्या पार्श्वभूमीवर हा प्रकार मुद्दाम करण्यात आला की काय ? याबद्दल देखील शहरात संताप व्यक्त केला जात आहे. अहमदनगरच्या फकीरवाडा भागात एका धार्मिक कार्यक्रमात एक युवक चक्क औरंगजेबाचा फोटो घेऊन नाचताना आढळून आलेला आहे. धक्कादायक बाब म्हणजे सदर युवक हा एका राजकीय पक्षाशी संबंधित असून त्याने स्वतःच्या प्रोफाईलला रील्समध्ये हा व्हिडीओ ठेवलेला आहे . औरंगजेबाचा फोटो झळकवणारा युवक हा एका राजकीय पक्षाशी संबंधित असल्याने धार्मिक ध्रुवीकरण करण्यासाठी जाणीवपूर्वक हा प्रकार केला असण्याची देखील नगरकरांमध्ये चर्चा आहे.
काही दिवसांपूर्वी कोल्हापूर इथे बहादूर शाह जफर यांच्या फोटोलाच औरंगाबादचा फोटो समजून एका दुकानाची तोडफोड करण्यात आलेली होती मात्र नगर येथील या घटनेत स्पष्टपणे फोटोच्यावरती चक्क औरंगजेब (रहे) असे मराठीत लिहिलेले असून सोबतच स्टेटसमध्ये ‘ बाप बाप होता है बेटा बेटा होता है ‘ अशी धार्मिक भावना भडकावणारा मजकूर ठेवण्यात आलेला आहे. सीसीटीव्ही फुटेजमध्ये देखील हा प्रकार कैद झालेला आहे. इस्लाममध्ये मुळातच डान्स आणि मिरवणूक या गोष्टीना स्थान नाही मात्र तरीही असा प्रकार आणि तो देखील धार्मिक भावना भडकावणारा असल्याने अशा प्रवृत्तीवर कठोर कारवाईची मागणी सर्वधर्मीय नागरिकांकडून केली जात आहे .
शहरातील फकीरवाडा भागात संदल उरुसाचे आयोजन करण्यात आलेले होते त्यादरम्यान काही मुस्लिम बांधवांसोबत लबेक ग्रुप नावाच्या एका ग्रुपचे एका राजकीय पक्षाशी संबंधित असलेले काही तरुण घुसून नाचत होते त्यातच हा तरुण कैद झालेला आहे. रविवारी रात्री हा प्रकार घडलेला असून शहरात त्यामुळे संतापाचे वातावरण आहे. जिल्हा पोलीस अधीक्षक राकेश ओला यांनी जबाबदारी स्वीकारल्यापासून नगर शहरात तसेच शेवगाव येथे देखील धार्मिक तणाव निर्माण झालेला आहे या पार्श्वभूमीवर पोलिसांच्या कार्यशैलीवर प्रश्नचिन्ह निर्माण झालेले आहे .
छत्रपती शिवाजी महाराज यांचा पराभव करण्यासाठी औरंगजेबाने क्रूरतेच्या सगळ्या मर्यादा पार केलेल्या होत्या त्यातून त्याने आपला स्वतःचा सख्खा भाऊ आणि वडिलांना देखील सोडले नाही मात्र तरीदेखील अशा व्यक्तीच्या वर्तणुकीबद्दल काही लोक सहानुभूती दाखवत असल्याने अशा शहरातील अशा अपप्रवृत्तीच्या विरोधात शहरात संतापाची लाट आहे. प्रशासनाने या घटनेची नोंद घेतलेली असली तरी या प्रकरणात गुन्हा दाखल करून कठोर कारवाईची गरज निर्माण झालेली आहे सोबतच सदर फ्लेक्स बोर्ड छापून मिरवण्यापर्यंत पोलिसांची गुप्त सूत्रे काय करत होती ? हा देखील प्रश्न आहे .
महाराष्ट्राचे गृहमंत्री देवेंद्र फडणवीस यांनी या प्रकरणी संताप व्यक्त केलेला असून ,’ औरंगजेबाचा फोटो झळकवणे कुठल्याही परिस्थितीत सहन केले जाणार नाही. औरंगजेबाचा फोटो कोणी झळकवत असेल तर ते मान्य केले जाणार नाही. देशात आणि महाराष्ट्रात छत्रपती शिवाजी महाराज आणि धर्मवीर छत्रपती संभाजी महाराज हेच आदरस्थानी असू शकतात कोणी औरंग्याचे नाव घेतलेले असेल तर त्याला माफी नाही , ‘ असे देखील फडणवीस यांनी म्हटलेले आहे.