बागेश्वरबाबा प्रकरण सध्या चांगलेच चर्चेत आलेले असून आणखीन एका बाबाची सोशल मीडियात नव्याने जोरदार चर्चा सुरू झालेली आहे. राजस्थान येथील राजसमंद येथील हा बाबा सध्याचा रहिवासी असून तो कंबलवाले बाबा नावाने चर्चेत आलेला आहे. आपण घोंगडीने चमत्कार करतो असा त्याचा दावा असून ज्या लोकांना लकवा आणि कधीच बरे न होणारे आजार आहेत ते आपण केवळ घोंगडीच्या साह्याने बरे करतो, असे त्याचे म्हणणे आहे.
उपलब्ध माहितीनुसार, गणेश भाई गुर्जर असे या बाबाचे खरे नाव असून मूळचा तो गुजरात येथील रहिवासी आहे. बाबागिरीचे गुजरात मॉडेल राजस्थानमध्ये चांगलेच धुमाकूळ घालत असून हा बाबा कंबलवाले बाबा नावाने परिसरात ओळखला जातो. त्याच्या खांद्यावर एक काळी घोंगडी आणि डोक्यावर काळी पगडी असते. आपल्या घोंगडीने आपण अनेक जणांना आजारातून बरे करतो असा या बाबाचा दावा आहे.
बाबाच्या म्हणण्यानुसार, माझ्या घोंगडीमध्ये आध्यात्मिक शक्ती आहे. ही घोंगडी मला आंब्याच्या झाडावर मिळालेली असून ही घोंगडी ज्या कुणाच्या अंगावर मी टाकेल तो बरा होईल. देवाने मला अशी अद्भुत शक्ती दिलेली आहे. देवाच्या आशीर्वादाने ही सिद्धी मला प्राप्त झालेली असून कोणत्याही व्यक्तीच्या अंगावर घोंगडी टाकल्यानंतर आणि त्याची नाडी आणि शीर पाहिल्यानंतर मला आजाराची माहिती होते. 32 वर्षांपासून मी हे काम करत असून शिबिर लावून आपण नागरिकांवर उपचार करतो , ‘ असे म्हटलेले आहे.
शिबिरात येण्यासाठी नागरिकांना 50000 पासून एक लाख रुपये आकारण्यात येतात आणि तिथे आल्यानंतर जेवणाचे ताट, बिसलरी पाणी अशा अनेक गोष्टी शिवाय वेगवेगळे चहा आणि यंत्र विकून या बाबाची मोठ्या प्रमाणात कमाई होते. हवन करण्यासाठी नारळांची गरज पडते त्यामुळे नारळांचा देखील व्यापार करून हा बाबा मोठ्या प्रमाणात पैसे कमवत आहे. शिबिर व्यवस्थापनात देखील या बाबांचे भक्त कार्यरत असून हे व्यवस्थापन करण्यासाठी एक रुपयाचा देखील खर्च या बाबाकडून केला जात नाही . साधेभोळे नागरिक सहजपणे अशा व्यक्तींच्या जाळ्यात अडकत असून अंधश्रद्धा निर्मूलन समितीने या प्रकरणात लक्ष घालण्याची गरज आहे.