
नांदेडमध्ये एक धक्कादायक घटना घडलेली असून प्रेमभंग झाल्याने एका प्रियकराने प्रेयसीचा चाकूने गळा चिरून खून केला आहे. घटनेमुळे परिसरात एकच खळबळ उडाली असून या विकृत तरुणाला पोलिसांनी अटक केली आहे.सुरेश शेंडगे असे आरोपीचे नाव असून सदर तरुणीच्या मृत्यूबद्दल नागरिकांमध्ये संताप व्यक्त केला जात आहे .शहरातील शारदानगर भागात ही घटना घडली असून वैष्णवी गौर ( वय 22) असं मयत तरुणीचं नाव आहे.
उपलब्ध माहितीनुसार, वैष्णवी गौर ही महाविद्यालयीन शिक्षण घेत होती आणि घर चालवण्यासाठी ती एका खाजगी संस्थेत नोकरी करत होती. मागील 3 ते 4 वर्षांपासून आरोपी सुरेश शेंडगेसोबत तिचे प्रेमसंबंध जुळले होते. शारदा नगर येथील झेंडा चौक परिसरात भाड्याच्या खोलीत तरुणी आपल्या आई-वडिलांसोबत राहत होती. तिचे वडील एका खाजगी शाळेत सुरक्षा रक्षक आहेत. काही दिवसांपासून वैष्णवी आणि सुरेशमध्ये दुरावा निर्माण झाला होता.
प्रेमभंग झाल्याने सुरेश हा नैराश्यात गेला होता. आज दुपारी तो वैष्णवीच्या घरी गेला त्यावेळी ती एकटीच घरात होती. घरी गेल्यावर सुरेशने तिला जाब विचारला आणि यावेळी दोघांमध्ये भांडण झाले. त्यानंतर रागाच्या भरात सुरेशने चाकू काढून तिचा गळा चिरला. यात तरुणीचा जागीच मृत्यू झाला. पोलिसांनी घटनास्थळाचा पंचनामा करून वैष्णवीचा मृतदेह शवविच्छेदनासाठी शासकीय रुग्णालयात पाठवला आहे तर आरोपीस अटक करण्यात आली आहे .