नगर दक्षिण मतदार संघाचे भाजपचे खासदार डॉ. सुजय विखे पाटील यांच्या पाठपुराव्याने नगर शहरात आणखी 3 उड्डाण पूल मंजूर झाले आहेत . नगर-छत्रपती संभाजी नगर महामार्गावरील पोलीस अधीक्षक कार्यालय चौक तसेच नगर मनमाड महामार्गावरील नागापूर येथील सन फार्मा चौक व याच रस्त्यावरील सह्याद्री चौक अशा तीन नव्या उड्डाण पुलां साठी 125 कोटीचा निधी मंजूर झाला असून नेहमीप्रमाणे शहरात ठिकठिकाणी विखे यांचे कार्यकर्ते असलेल्या फ्लेक्स सम्राटांनी मंजुरी मिळताच जाहिरातबाजीला सुरुवात केलेली आहे.
नगर-मनमाड हायवेवर उड्डाणपुलाची निर्मिती होणे ही काळाची गरज होती. कारण नगर शहरात प्रवेश करताना सनफार्मा, सह्याद्री चौक आणि डि. एस. पी. चौक येथे प्रचंड ट्रॅफिक निर्माण होत होती. त्यामुळे उसळणारी वाहनांची गर्दी ही डोकेदुखी ठरत होती. तातडीच्या कामांसाठी जाणाऱ्या किंवा येणाऱ्या नागरिकांना मोठ्या प्रमाणात अडचणींचा सामना करावा लागत होता. नगर शहरातील प्रलंबित असलेला पहिला उड्डाणपूल हा खासदार डॉक्टर सुजय विखे यांच्या पाठपुराव्यानंतरच झालेला आहे .
महाराष्ट्र शासनाच्या सार्वजनिक बांधकाम विभागाच्या वतीने उपलब्ध करून देण्यात येणाऱ्या या निधीमध्ये नवीन उड्डाणपुलाचे बांधकाम, सेवा रस्ता व पोहोचमार्गाचे बांधकाम तसेच संकीर्णबाबी आदी गोष्टींचा समावेश असेल. अहमदनगर वासियांसाठी ही महत्वाची बातमी असून वाहतुकीच्या कोंडीमुळे इथे मोठा अडथळा निर्माण होत होता. नगर शहरात आणखीन उड्डाणपूलांची देखील गरज असून सक्कर चौकापासून तर झोपडी कॅन्टीनपर्यंत देखील एक उड्डाणपूल होण्याची नितांत गरज आहे.
