पुण्यातील स्वारगेट बस आगारामध्ये काही दिवसांपुर्वी एका 26 वर्षीय तरूणीवर बलात्कार झाल्याची घटना घडली होती. आरोपी दत्ता गाडे याच्या वकिलावरती हल्ला झाल्याची माहिती समोर आली असून साहिल डोंगरे असे हल्ला झालेल्या वकिलाचे नाव आहे.
काल (सोमवारी) संध्याकाळी हडपसर येथून डोंगरे यांचे अपहरण करुन त्यांना बोपदेव घाटात नेऊन बेदम मारहाण करण्यात आली आणि त्यानंतर दिवेघाटात सोडून देण्यात आले. मारहाण झाल्यानंतर दत्ता गोडेचे वकील साहिल डोंगरे यांनी जखमी अवस्थेत हडपसर पोलीस ठाण्यात जाऊन तक्रार दिली आहे. ॲडव्होकेट डोंगरे यांच्यावर ससून रुग्णालयात उपचार करण्यात येत आहेत. दत्ता गोडेचे वकील वाजीद खान यांचे साहिल डोंगरे सहायक वकील असून घटनेमागचे कारण समोर आलेले नाही.
पुण्यातील स्वारगेट बस स्थानकावर एका 26 वर्षीय तरुणीवर डेपोमध्येच असलेल्या ‘शिवशाही’ बसमध्ये 25 फेब्रुवारीच्या पहाटे बलात्काराची घटना घडली होती. फलटणला निघालेल्या तरुणीला चुकीच्या शिवशाही बसमध्ये नेऊन आरोपीनं तिच्यावर अत्याचार केला होता.
आरोपीने स्वत: कंडक्टर असल्याचं भासवून पीडित महिलेला ताई म्हणून तिचा विश्वास मिळवला. आरोपीने तरूणीला चुकीची बस दाखवली होती तसेच बसमध्ये अनेक लोक असल्याचं त्यानं भासवलं होतं मात्र बस पूर्णपणे रिकामी होती. बसमधून बाहेर येण्याचा प्रयत्न केला होता. मला बाहेर सोडा, अशीही विनंती तिने केली. मात्र, आरोपीने तरूणीला मारहाण करून जबरदस्तीने तिच्यावर दोनवेळा लैंगिक अत्याचार केला आणि त्यानंतर तो पळून गेला होता.
