महाराष्ट्रात गुन्हेगारी बोकाळलेली पहायला मिळत असून पोलीस देखील सुरक्षित नसल्याचे भीतीदायक चित्र राज्यात निर्माण झाले आहे. बुलढाणा जिल्ह्यातील सिंदखेडराजा येथे एका पोलीस कर्मचाऱ्याचा कारमध्ये मृतदेह आढळून आला आहे. जालना जिल्ह्यातील पोलीस दलाच्या महामार्ग विभागात कार्यरत असलेले ज्ञानेश्वर म्हस्के यांची अज्ञात आरोपीने गळा आवळून हत्या केलेली आहे. रात्री उशिरा या प्रकरणी ४ संशयितांना ताब्यात घेण्यात आले आहे.
उपलब्ध माहितीनुसार , ज्ञानेश्वर म्हस्के असे मयत झालेल्या कर्मचाऱ्याचे नाव असून फोन उचलत नसल्याने म्हस्के यांच्या पत्नीने तक्रार केल्यावर पोलिसांनी मोबाईल लोकेशन ट्रेस केले त्यावेळी सिंदखेडराजा रोडवरील आर जे इंटरनॅशनल स्कूलसमोरील वन विभागाच्या हद्दीत त्यांची कार उभी असल्याचे आढळले. पोलीस उपविभागीय अधिकारी मनीषा कदम, पोलीस निरीक्षक संतोष महल्लेसह पोलीस कर्मचारी घटनास्थळी दाखल झाले तेव्हा कारमध्ये त्यांचा मृतदेह आढळून आला. कारचे दरवाजे आतून बंद होते
घटनेचे गांभीर्य लक्षात घेऊन अपर पोलीस अधीक्षक बी.बी महामुनी यांनी घटनास्थळी भेट देऊन तपासासाठी मार्गदर्शन केले. श्वान पथक आणि फॉरेन्सिक टीम तपासासाठी पाचारण करण्यात आले. मृतदेह पोस्टमोर्टमसाठी स्थानिक ग्रामीण रूग्णालयात पाठवण्यात आला. पोलिसांनी रात्री उशीरा ४ संशयितांना ताब्यात घेतले आहे. त्यांची चौकशी सुरू आहे. लवकरच या खून प्रकरणाचा उलगडा होईल असं पोलीस सूत्रांनी सांगितले आहे.
