धक्कादायक.. ‘गुगल मॅप’ च्या भरवशावर कार घातली थेट धरणात, एकाचा मृत्यू

  • by

अनोळखी भागात प्रवास करताना रस्ता शोधण्यासाठी अनेक जण गुगल मॅप्सचा वापर करतात. मात्र अनेकदा यामुळे फसगतही होऊ शकते. कित्येकदा पुलावरून जाताना देखील गूगल असिस्टंट लेडी, डावीकडे, उजवीकडे असे संदेश देत असते. पिंपरी-चिंचवडच्या तिघा उद्योजकांना गुगल मॅप्सचा असाच वाईट अनुभव आला. गुगलने त्यांना रस्ता दाखविला खरा पण तो थेट धरणात जाणारा होता. त्यामुळे त्यांची कार पाण्यात बुडाली आणि एकाचा मृत्यू झाला, दोघे जण मात्र पोहत बाहेर आले. सदर घटना नगर जिल्ह्यात अकोले तालुक्यात घडली आहे.

उपलब्ध माहितीनुसार, मूळचे कोल्हापूरचे मात्र सध्या पुण्यात स्थायिक असलेले तिघे उद्योजक मित्र विकेण्डला कळसुबाई शिखरावर ट्रेकिंगसाठी निघाले होते. गुरू सत्याराज शेखर (वय ४२) व समीर राजूरकर (वय ४४) हे मित्र वाहनचालक सतीश सुरेश घुले (वय ३४, रा. पिंपरी) यांच्यासह कारने (एमएच १४ केवाय ४०७९) निघाले होते.

नगर जिल्ह्यामधील रस्त्यांचा अंदाज नसल्याने रस्ता माहिती नसल्याने त्यांनी गुगल मॅप्सचा अधार घेतला. गुगलने त्यांना जवळचा रस्ता म्हणून कोतूळहून अकोलेकडे जाणारा रस्ता दाखविला. वास्तविक हा रस्ता पावसाळ्यात बंद असतो. कारण त्यावरील पूल पिंपळगाव खांड धरणाच्या पाण्याखाली जातो. स्थानिक लोकांना याची माहिती असल्याने त्या रस्त्याने कोणी जात नाही.

ह्या वर्षी जिल्ह्यात तुलनेने पाऊस जास्त झाल्याने अद्यापही या पुलावर सुमारे २० फूट पाणी आहे. एक तर अंधार आणि रस्त्याची माहिती नाही आणि विचारायला देखील कोणी नाही त्यामुळे गुगल मॅपवर विश्वास ठेवत घुले यांनी गाडी पुढे नेली. मात्र ती थेट खोल पाण्यात गेली. गुरू शेखर व समीर राजूरकर यांनी कारमधून बाहेर पडत कशीबशी आपली सुटका करून घेतली. सतीश घुले यांचा मात्र मृत्यू झाला.

या पुलावर पाणी आल्यावर तो बंद असतो. मात्र तेथे बांधकाम विभागाच्या भोंगळ कारभारामुळे कोणतीही सूचना किंवा अडथळा उभारण्यात आलेला नाही. अंधारात नवख्या कार चालकाला याचा अंदाज आला नाही. त्यामुळे हा अपघात झाल्याचे प्रथमदर्शनी दिसून येते. अपघाताची माहिती मिळाल्यावर परिसरातील लोक मदतीला धावली. अपघाग्रस्तांचे नातेवाईकही तेथे आले. पाण्यातून कार आणि चालकाचा मृतदेह बाहेर काढण्यात आला.