‘ असं वार गेलं अन मी गरोदर झाले ‘, महिलेच्या अजब दाव्याने देशभर खळबळ

शेअर करा

एका इंडोनेशियन महिलेने चक्रावून सोडणारा दावा केला आहे. या महिलेने आपल्याला हवेमुळे गर्भधारणा झाली असल्याचा दावा केला आहे. या महिलेने एका स्थानिक वाहिनीसोबत बोलताना हा दावा केला आहे. आपण कोणत्याच पुरुषासोबत शारिरीक संबंध ठेवले नव्हते. तरीदेखील आपण गरोदर झाली असल्याचा दावा त्यांनी केला.

या महिलेने सांगितलेला दावा हास्यास्पद वाटणारा आहे. महिलेने दिलेल्या माहितीनुसार, दुपारच्या प्रार्थनेनंतर घरी आराम करत असताना अचानक हवेचा स्पर्श जाणवू लागला. ही हवा आपल्या शरीरात प्रवेश करत असल्याचे वाटत होते. या घटनेच्या १५ मिनिटानंतर पोट दुखू लागले आणि पोट मोठे होऊ लागले असल्याची माहिती तिने दिली. प्रसुती वेदना जाणवू लागल्याने तिने तातडीने रुग्णालयात धाव घेतली. रुग्णालयात तिने एका गोंडस मुलीला जन्म दिला. नवजात बाळ आणि आईची प्रकृती उत्तम आहे.

या महिलेच्या अजब प्रसुतीची बातमी चांगलीच व्हायरल झाली. त्यानंतर स्थानिक कम्युनिटी क्लिनिकच्या प्रमुखांनी याबाबतची माहिती घेण्यासाठी या महिलेची भेट घेतली. या भेटीत महिलेचा विवाह झाला असल्याचे त्यांना समजले. मात्र, ही महिला आणि पती वेगवेगळे राहत आहेत. या महिलेला आधीच एक मुलगी आहे.

कम्युनिटी क्लिनिकचे प्रमुख इमान सुलेमान यांनी सांगितले की, आई आणि बाळ दोघांचीही प्रकृती चांगली आहे. नैसर्गिकपणे प्रसुती झाली असून नवजात मुलीचे वजन २.९ किलो आहे. सुलेमान यांनी हे प्रकरण ‘गुप्त गर्भावस्था’ असल्याची शक्यता वर्तवली. यामध्ये महिलेला प्रसुती आधी वेदना जाणवत नाहीत. स्थानिक पोलिसांनी या प्रकरणी तपास सुरू केला आहे. या महिलेच्या वैवाहिक आयुष्यासह इतर पैलूंचाही तपास पोलिसांनी सुरू केला आहे.


शेअर करा