वर्दीला डाग..महिला वसतिगृहात पोलिसांनी तरुणींना कपडे काढून नाचायला लावलं

  • by

जळगावातील महिला वसतिगृहात तरुणींना कपडे काढून नाचायला लावल्याचा धक्कादायक प्रकार उघडकीस आला आहे. काही पोलीस कर्मचारी आणि वसतिगृहाबाहेरील पुरुष मंडळी या कृत्यात सहभागी असल्याचा आरोप आहे. सामाजिक संघटनांनी या प्रकरणाला वाचा फोडून जिल्हाधिकाऱ्यांकडे तक्रार केली असून सदर निंदनीय प्रकारची चौकशी सुरु आहे.

जळगावमधील शासकीय आशादीप महिला वसतिगृहात तरुणींना कपडे काढून नृत्य करायला भाग पाडल्याचा आरोप केला जात आहे. जिल्हाधिकाऱ्यांकडे याबद्दल व्हिडीओही सादर केला गेला आहे. जिल्हाधिकारी अभिजित राऊत यांनी तातडीने दखल घेऊन या प्रकरणाची चौकशी करण्याचे आश्वासन दिले असून याआधी देखील महिला आणि बालकल्याण विभागामार्फत गणेश कॉलनीतील वसतिगृहात निराधार आणि अन्याय, अत्याचार झालेल्या महिला आणि मुलींच्या निवारा-भोजनाची व्यवस्था केली जाते. सदर वसतिगृहात गैरप्रकार घडत असल्याच्या तक्रारी याआधी देखील आलेल्या होत्या.

जननायक फाऊंडेशनचे अध्यक्ष फिरोज पिंजारी, फरीद खान, मंगला सोनवणे यांनी वसतिगृह गाठून महिला आणि मुलींना भेटून माहिती जाणून घेतली असता एक मार्च रोजी काही पोलीस कर्मचारी आणि बाहेरील पुरुषांनी मुलींना कपडे काढून जबरदस्तीने नृत्य करायला भाग पाडल्याचा प्रकार समोर आला. काही कर्मचाऱ्यांच्या संगनमताने बाहेरील लोकांना आणि पोलिसांना चौकशीच्या नावाखाली आतमध्ये प्रवेश देऊन अनैतिक कृत्य केले जात असल्याची कैफियत काही मुलींनी मांडली. ज्या मुली चुकीच्या कृत्यांना नकार देतात, त्यांना मारहाण करण्याची धमकी दिली जाते.

सामाजिक कार्यकर्त्यांना देखील आतमध्ये प्रवेश देण्यात आला नव्हता, मुली बाहेरुनच खिडकीतून आपल्यावर बेतलेले प्रसंग ओरडून सांगत होत्या. या मुली बोलण्याचा प्रयत्न करत असताना त्यांनाही संस्थेच्या कर्मचाऱ्यांकडून मज्जाव केला जात होता मात्र तरीदेखील न घाबरता या मुलींनी आपले म्हणणे या कार्यकर्त्यांसमोर मांडले आहे . सहभागी व्यक्ती आणि पोलीस अधीकारी व कर्मचाऱ्यांवर देखील कठोरात कठोर कारवाईची मागणी आता केली जात आहे .

बीडमधील मुलींच्या वसतिगृहातील आयसोलेशन सेंटरमध्ये धक्कादायक आणि किळसवाणा प्रकार काही दिवसांपूर्वी समोर आला होता. या वसतिगृहातील मुलींच्या कपड्यावर अश्लील लिखाण करण्यात आलं होतं. तसंच या ठिकाणच्या वस्तूंची पळवापळव करुन कागदपत्रही फाडण्यात आले होतं. सोलापुरातील मुलींच्या शासकीय वसतिगृहात हा धक्कादायक प्रकार घडल्याने खळबळ उडाली होती.