पंढरपूर पोटनिवडणूकीत लागली इलेक्शन ड्युटी मात्र त्यानंतर कोरोना लागला पाठी आणि …

  • by

पंढरपूर पोटनिवडणुकीमुळे सोलापूर जिल्ह्यात करोना मोठ्या प्रमाणात वाढला आहे. निवडणुका पार पडल्यापासून शहरांमध्ये कोरोना रुग्णांची आणि मृतांची संख्या झपाट्याने वाढत आहे. सगळ्यात धक्कादायक बाब म्हणजे निवडणूक प्रक्रियेत काम करणाऱ्या अनेकांना करोनाची लागण झाल्याचं समोर झालं आहे. नुकत्याच हाती आलेल्या वृत्तानुसार इलेक्शन ड्यूटिला गेलेल्या शिक्षकासह कुटुंबातील चौघांचा कोरोनामुळे मृत्यू झाला आहे. या घटनेमुळे संपूर्ण जिल्ह्यात खळबळ उडाली आहे.

अधिक माहितीनुसार, सांगोला तालुक्यातील घेर्डी इथले प्रमोद माने हे करोनाच्या जीवघेण्या संसर्गात इलेक्शन ड्यूटिला गेले होते. प्रमोद माने हे शिक्षक आहे. पण लॉकडाऊनमुळे त्यांना इलेक्शन ड्यूटिला जावं लागलं. यानंतर त्यांना करोनाची लागण झाली. पंढरपूरमध्ये त्यांच्यावर उपचार सुरू होते. पण तब्येत आणखी खालावल्याने त्यांना मुंबईत पुढील उपचारासाठी दाखल करण्यात आलं.

मुंबईतही प्रमोद यांच्या प्रकृतीमध्ये सुधारणा झाली नाही. अखेर त्यांची करोनाशी झुंज संपली आणि मृत्यू झाला. या सगळ्यात त्यांच्या संपूर्ण कुटुंबाला संसर्ग झाल्याचं समोर आलं. त्यांच्या घरात पत्नी, मुलगा, आई, वडील आणि मावशी यांनाही लागण झाल्यानं सगळ्यांवर उपचार सुरू होते. पण करोनाच्या या संसर्गापुढे सध्या आरोग्य व्यवस्था अपुरी असल्याने माने यांच्या कुटुंबातील सगळ्यांचाच दुर्दैवी मृत्यू झाला.

करोनाच्या या आजारामुळे संपूर्ण कुटुंब संपलं खरं पण यात पंढरपूर पोटनिवडणूकही कारण ठरली. आधीच हा संसर्ग झपाट्याने पसरत आहे. त्यात निवडणुकांच्या कामासाठी वारंवार होणाऱ्या बैठका, नेत्यांचे दौरे आणि भेटीगाठी वाढल्याने तो आणखी बळावला. त्यात निवडणुकीचं काम म्हटलं की गर्दी आलीच. यावेळी सर्रासपणे कोरोनाच्या नियमांचा फज्जा उडवण्यात आला. त्यामुळे धोका आणखी वाढला. माने यांच्या कुटुंबातील करता पुरूष गेला. त्यामागे संपूर्ण कुटुंब संपल्यामुळे परिवारातील इतरांना दु:खाचा डोंगर कोसळला आहे. तर संपूर्ण गावात या घटनेमुळे शोककळा पसरली आहे.