नाशिकमध्ये कडक लॉकडाऊनचा निर्णय,सर्व दुकाने बंद : जाणून घ्या नवे नियम

शेअर करा

करोनाच्या पार्श्वभूमीवर राज्यभरातील विविध भागांमध्ये निर्बंध कडक केले जात असतानाच नाशिक शहरातही लॉकडाऊनची घोषणा करण्यात आली आहे. नाशिकमध्ये १२ तारखेपासून संपूर्ण लॉकडाऊन असणार आहे. नाशिकचे मनपा आयुक्त कैलास जाधव यांनी याबाबतची माहिती दिली. दहा दिवस शहरात कडक लॉकडाऊन असेल. या लॉकडाऊन काळात शहरातील सर्व दुकाने बंद राहतील. हॉस्पिटल आणि मेडिकल सोडून सर्व व्यवहार बंद ठेवण्यात येणार आहेत. तसंच लॉकडाऊन दरम्यान नागरिकांना विनाकारण रस्त्यावर फिरण्यास मनाई करण्यात आली आहे.

‘जिल्हा आपत्ती व्यवस्थापन समितीची आज जिल्ह्याधिकाऱ्यांच्या अध्यक्षतेखाली बैठक झाली. या बैठकीत लॉकडाऊनचा निर्णय घेण्यात आला आहे. निर्बंध असतानाही लोक मोठ्या प्रमाणात रस्त्यावर फिरताना दिसत आहेत. त्यामुळे हा निर्णय घेण्यात आला. कडक लॉकडाऊनच्या काळात नागरिकांना वैद्यकीय कारणाशिवाय इतर कोणत्याही गोष्टीसाठी बाहेर फिरता येणार नाही. नागरिकांना किराणा आणि इतर अत्यावश्यक वस्तूंच्या खरेदीसाठी परवा दुपारपर्यंतचा वेळ असेल. १२ मे रोजी दुपारी १२ पासून २२ मे रोजी रात्री १२ वाजेपर्यंत कडक लॉकडाऊन असेल,’ अशी माहिती महापालिका आयुक्त कैलास जाधव यांनी दिली आहे. नागरिक रस्त्यावर विनाकारण गर्दी करत असल्याचे आढळून आल्यानंतर हा निर्णय घेण्यात आला आहे .

‘नाशिक बाजार’ या अ‍ॅपवरूनही नागरिकांना भाजीपाला, दूध, औषधे यांची खरेदी करता येईल, असंही पालिका आयुक्तांनी म्हटलं आहे. याआधीही महाराष्ट्रातील अनेक ठिकाणी लॉकडाऊनबाबत निर्णय घेण्यात आला आहे. सातारा, सांगली, कोल्हापूर, सोलापूर या जिल्ह्यांसह अनेक स्थानिक स्वराज्य संस्थांनी कडक निर्बंध लादले आहेत. त्यामुळे संपूर्ण महाराष्ट्रच कडक लॉकडाऊनच्या दिशेने वाटचाल करत आहे का, असा प्रश्न उपस्थित होत आहे. बहुतांश शहरात लॉकडाऊन हा शब्द न वापरता प्रत्यक्षात मात्र सर्व नियम हे लॉकडाऊनचेच लागू आहेत.


शेअर करा