सोमवारपासून लॉकडाऊन हटवण्याच्या तयारीत असतानाच ‘ ह्या ‘ देशात कोरोनाची तिसरी लाट दाखल

शेअर करा

करोना लसीकरण वेगाने करणाऱ्या ब्रिटनमध्ये करोनाची तिसरी लाट आली असून बाधितांच्या संख्येत दिवसेंदिवस वाढ होत आहे. ब्रिटनमध्ये शुक्रवारी ५१ हजार ८७० हून अधिक बाधितांची नोंद करण्यात आली. मागील सहा महिन्यानंतर एवढ्या करोनाबाधितांची नोंद झाली आहे. तर दुसरीकडे सरकारने लॉकडाउन न हटवण्याची मागणी तज्ज्ञांनी केली आहे मात्र तरीही ब्रिटनमध्ये १९ जुलैपासून निर्बंध हटवण्यात येणार आहे.

ब्रिटनमध्ये जवळपास ६८ टक्के लोकसंख्येला लस देण्यात आली आहे. यामध्ये किमान एक डोस घेतलेल्या नागरिकांचाही समावेश आहे. ब्रिटनमध्ये सोमवारपासून करोना निर्बंध हटवण्याची तयारी सुरू झाली आहे. त्याआधीच करोनाबाधितांच्या संख्येत वाढ झाल्याने प्रशासनाची चिंता वाढली आहे. करोनाच्या संसर्गामुळे रुग्णालयात दाखल होणाऱ्या संख्या दर आठवड्याला दुप्पट होत आहे.

ब्रिटनचे आरोग्य मंत्री साजिद जावेद यांनाही करोनाची लागण झाली आहे. ब्रिटनमध्ये करोनाची तिसरी लाट ही दुसऱ्या लाटेपेक्षा अधिक भयावह असण्याची भीती व्यक्त केली जात आहे. जानेवारी महिन्यात करोनाची दुसरी लाट आली होती. त्यावेळी ८ जानेवारी रोजी सर्वाधिक ६७ हजार ८०३ नवीन बाधितांची नोंद करण्यात आली होती. तर तिसऱ्या लाटेत शुक्रवारी १६ जुलै रोजी ५१ हजार ८७० बाधितांची नोंद करण्यात आली आहे . हा आकडा चिंताजनक असून परिस्थिती भयावह आहे .

ब्रिटनमध्ये येत्या सोमवारपासून (१९ जुलै) करोना निर्बंध पूर्णपणे उठविण्यात येणार असून हा दिवस कोव्हिड मुक्तिदिन म्हणून साजरा करण्याची घोषणा पंतप्रधान बोरिस जॉन्सन यांनी नुकतीच केली आहे. वैज्ञानिकांनी मात्र या घोषणेविषयी चिंता व्यक्त केली आहे. पंतप्रधान बोरिस जॉन्सन यांच्या निर्णयाला दोन तृतीयांश ब्रिटिश नागरिकांनी विरोध दर्शविला आहे. केंटर या संस्थेने सात ते १२ जुलै या काळात १,०५७ लोकांचे ऑनलाइन सर्वेक्षण केले. त्यात ही बाब स्पष्ट झाली. थोडे का होईना निर्बंध असावेत, असे मत ६६ टक्के नागरिकांनी नोंदवले आहे. सार्वजनिक ठिकाणी मास्क वापरलाच पाहिजे, असे मत ६० टक्के नागरिकांनी व्यक्त केले.

ब्रिटनमध्ये करोनाबाधितांची संख्या वाढण्यामागे डेल्टा वेरिएंट कारणीभूत असल्याचे म्हटले जात आहे. बाधितांमध्ये डेल्टा वेरिएंटची लागण झालेल्यांची संख्या लक्षणीय आहे. डेल्टा वेरिएंट पहिल्यांदा भारतात आढळला होता. ब्रिटनमध्ये करोना लसीकरणासाठी ऑक्सफर्ड-अॅस्ट्राझेनकाच्या लशीचा मोठ्या प्रमाणावर वापर करण्यात आला. डेल्टा वेरिएंटवर लशीचा फार परिणाम होत नसल्याचे म्हटले जात आहे. लसीमुळे गंभीर आजारी होण्याचा धोका मोठ्या प्रमाणावर कमी होत असल्याचे तज्ज्ञांनी म्हटले आहे. ऑक्सफर्ड-अॅस्ट्राझेनकाची लस भारतात कोविशिल्ड या नावाने उपलब्ध आहे. ‘सीरम इन्स्टिट्यूट ऑफ इंडिया’ ही लस तयार करत आहे.


शेअर करा