नगर येथील जिल्हाधिकारी कार्यालयासमोर नेवासा तालुक्यातील घोगरगाव येथील कणगरे कुटुंबीय यांनी सुरू केलेल्या आमरण उपोषणाचा आज पाचवा दिवस असून उपोषणकर्त्या कुटुंबातील वृद्ध आजी शकुंतला कणगरे यांची प्रकृती आज सकाळी खालावली होती त्यानंतर तात्काळ वैद्यकीय पथकाने उपोषणस्थळी जाऊन त्यांच्या प्रकृतीची तपासणी केली आणि त्यांना सलाईन घेण्याचा सल्ला दिलेला होता मात्र आजीबाईंनी तो सल्ला नाकारलेला असून घटनास्थळीच माझ्यावर उपचार केले जावे अशी मागणी केलेली आहे. तोफखाना पोलीस स्टेशनचे पोलीस निरीक्षक मधुकर साळवे यांनी उपोषणस्थळी भेट देऊन कुटुंबीयांच्या प्रकृतीची विचारपूस केली असून कणगरे कुटुंबीय रस्ता खुला करण्याच्या मागणीवरून अद्यापही उपोषणाच्या निर्णयावर ठाम आहेत. वंचीत बहुजन आघाडीचे जिल्हा जिल्हा महासचिव योगेश साठे यांनी देखील उपोषण करणाऱ्या कुटुंबियांच्या प्रकृतीची भेट देऊन विचारपूस केली असून कुटुंबियांचे मेडिकल चेकअप जिल्हा रुग्णालय प्रशासनाकडून नियमित केले जात आहे.
शकुंतला अण्णासाहेब कणगरे आणि त्यांच्या कुटुंबीयाची मौजे घोगरगाव येथील गट क्रमांक 255 आणि 256 मध्ये जमीन असून त्यांच्या घराकडे आणि शेतीकडे जाण्याचा रस्ता त्यांच्याच भावकीतील अविनाश नाना कणगरे ,वसंत नाना कणगरे ,प्रभाकर नाना कणगरे यांनी अडवून ठेवल्याप्रकरणी तहसीलदार यांच्याकडे अनेकदा तक्रारदार कुटुंबीयांनी अर्ज दाखल केलेला होता. तहसीलदार यांनी 2017 मध्ये हा रस्ता पोलीस बंदोबस्तात खुला करून दिला त्यानंतर या रस्त्याचे काही प्रमाणात खडीकरण आणि मुरुमीकरण देखील करण्यात आले मात्र पुन्हा एकदा जून महिन्यानंतर हा रस्ता अडवण्यात आलेला असून हा रस्ता खुला करावा या मागणीसाठी शकुंतला कणगरे यांच्या कुटुंबीयांनी आमरण उपोषणाला सुरुवात केलेली आहे.
उपोषणासंदर्भात त्यांनी एक निवेदन दिलेले असून त्यामध्ये त्यांच्या घरात शाळेत जाणारी मुले असून शाळेत ये जा करणे त्यांना अशक्य झालेले आहे. रस्ता बंद केल्यामुळे शेतात मशागत करण्यासाठी जाता येत नाही आणि शेतजमीन देखील पडीक झालेली आहे. ज्या व्यक्तींनी हा रस्ता अडवलेला आहे त्यांना राजकीय पाठबळ असल्याकारणाने सरकारी निधीत देखील त्यांनी फेरफार करत कणगरे कुटुंबीयांवर अन्याय सुरू केलेला आहे असेही त्यांचे म्हणणे आहे. आरोपींनी याआधी देखील उपोषणकर्त्या कुटुंबियांच्या घरातील महिलांना मारहाण केलेली आहे. वेळोवेळी तहसीलदार साहेब , पोलीस स्टेशन नेवासा आणि जिल्हा पोलीस अधीक्षक यांच्याकडे तक्रारी देऊन देखील हा रस्ता खुला करण्यात आलेला नाही असे उपोषणकर्त्या कुटुंबीयांचे म्हणणे आहे.
प्रतिनिधीशी बोलताना शकुंतला कणगरे यांच्या कुटुंबीयांनी , आरोपींनी या आधी देखील आमच्या घरातील महिलांना मारहाण केलेली असून आरोपी व्यक्ती हे आधी जेल भोगून आलेले असल्याने कुणाला मोजत नाहीत असे म्हटलेले आहे . सरकार दरबारी आपल्याला कुठलाही न्याय मिळत नाही तर दुसरीकडे आरोपीची पाठराखण प्रशासनाकडून सुरू असल्याने आपल्या जीविताला देखील धोका आहे असे सांगत 12 तारखेपासून त्यांनी बेमुदत आमरण उपोषणाला सुरुवात केलेली आहे. कणगरे कुटुंबियांच्या उपोषणाला वंचित बहुजन आघाडी नेवासा सोबतच केंद्रीय लोकशाही पत्रकार संघ यांनी पाठिंबा जाहीर केलेला आहे