आमदार खासदारांपासून कार्यकर्त्यांपर्यंत सातत्याने निर्लज्ज विधाने करण्याचा भाजपचा इतिहास राहिलेला आहे अशातच भाजपच्या एका खासदाराने एक असं वक्तव्य केलं आहे ज्याने नवा वाद सुरु झाला आहे. ओडिशातील बारगढ येथील भाजप खासदार प्रदीप पुरोहित यांनी संसदेत म्हटलं की, पंतप्रधान मोदी हे गेल्या जन्मी छत्रपती शिवाजी महाराज होते. खासदाराच्या या विधानामुळे संसदेपासून ते सोशल मीडियापर्यंत संताप व्यक्त केला जात आहे. शिवप्रेमींच्या भावना भाजपच्या या खासदाराने दुखावलेल्या असून त्यांच्यावर कारवाईची देखील मागणी शिवप्रेमीकडून केली जात आहे.
भाजप खासदार प्रदीप पुरोहित यांनी लोकसभेत बोलताना सांगितलं की, ते एका साधूला भेटले होते. त्या साधूने त्यांना सांगितलं की पंतप्रधान नरेंद्र मोदी हे गेल्या जन्मी छत्रपती शिवाजी महाराज होते. पंतप्रधान मोदी हे खरे तर छत्रपती शिवाजी महाराज आहेत, ज्यांनी महाराष्ट्रासह संपूर्ण देशाला विकास आणि प्रगतीकडे नेण्यासाठी पुनर्जन्म घेतला आहे.
प्रदीप पुरोहित यांच्या या विधानाला काँग्रेससह विरोधी पक्षातील अनेक सदस्यांनी विरोध केला आहे. प्रदीप पुरोहित यांच्या वक्तव्यावर टीका करत काँग्रेस खासदार वर्षा गायकवाड यांनी X वर पोस्ट केली आहे. “अखंड हिंदुस्तानाचे आराध्य दैवत आणि रयतेचे राजे छत्रपती शिवाजी महाराज यांचा वारंवार अपमान करण्याचे आणि महाराष्ट्रातील तसेच जगभरातील शिवप्रेमींची अस्मिता दुखावण्याचे नियोजनबद्ध कारस्थान भाजपच्या नेतेमंडळींकडून केले जात आहे. या लोकांनी छत्रपती शिवाजी महाराजांचा मानाचा जिरेटोप नरेंद्र मोदी यांच्या डोक्यावर बसवून शिवरायांचा घोर अपमान केला आणि आता या भाजप खासदाराचे हे घृणास्पद वक्तव्य ऐका… शिवरायांचा वारंवार अपमान करणाऱ्या भाजपचा आम्ही जाहीर निषेध करतो. भाजप शिवद्रोही आहे. शिवरायांचा अपमान आम्ही कदापि सहन करणार नाही. नरेंद्र मोदींनी त्वरित देशाची माफी मागावी आणि या खासदाराला निलंबित करावे.”
भाजप खासदार प्रदीप पुरोहित यांच्या वक्तव्याचा सोशल मीडियावरही मोठ्या प्रमाणात निषेध केला जात आहे. हा छत्रपती शिवाजी महाराजांचा अपमान केल्याचं त्यांचं म्हणणे आहे.
