अंमली पदार्थाच्या वाहतुकीसाठी ड्रग्जच्या कॅप्सूलची तस्करी करण्याचा प्रकार यापूर्वी अनेकदा घडला आहे. मात्र आपल्या अपंगत्त्वाचा आधार घेऊन कोट्यवधींच्या अंमली पदार्थांची वाहतूक करणाऱ्या एकाला नागपूर पोलिसांनी मंगळवारी नाट्यमयरित्या अटक केली.
सलमान खान असे नागपूर पोलिसांच्या गुन्हे शाखेने अटक केलेल्या ड्रग्ज तस्कराचे नाव आहे. त्याच्याकडून पोलिसांनी १३ लाख रुपये किमतीचे एमडी आणि ७ लाख ८० हजार रुपयांचे चरस जप्त केले आहे. धक्कादायक बाब म्हणजे सलमानने या पूर्वी चार वेळा अशा प्रकारे आपल्या कृत्रिम पायातून ड्रग्जची तस्करी केली आहे.
अंमली पदार्थाच्या तस्करी विरोधात दोन दिवसांपासून नागपूर गुन्हे शाखेने धडक मोहीम हाती घेतली आहे. लॉकडाऊनच्या काळातही पोलिसांनी तब्बल ८६ ठिकाणी छापे टाकून झाडाझडती घेतली आहे. नागपूर शहरात वेगवेगळ्या पोलिस ठाण्यांतर्गत १३ कारवाया करत पोलिसांनी ड्रग्ज, एमडी, चरस रासख्या अंमली पदार्थांची वाहतूक करणाऱ्या २० जणांच्या मुसक्या आवळत त्यांना अटक केली आहे.
लॉकडाऊन काळात ट्रकचे टायर, ट्यूब आणि छोट्या छोट्या पार्सलमधूनही अंमली पदार्थांची तस्करी पोलिसांनी शोधून काढली आहे. मात्र याावेळी एक तस्कर कृत्रिम पायातून ड्रग्जची तस्करी करणार असल्याची टीप पोलिसांना मिळाली होती. त्याआधारे पोलिसांनी सापळा रचला असता सलमान नावाचा एक तस्कर पोलिसांच्या हाती लागला. त्याची झडती घेतली असता त्याचा डावा पाय कृत्रिम असल्याचे पोलिसांना दिसले. त्याची झडती घेतल्यानंतर पोलिसांनी त्यात एम.डी. नावाचा अंमली पदार्थ सापडला.
या प्रकरणातील आरोपी सलमान खान याची कसून चौकशी केली असता त्याने यापूर्वी चार वेळा मुंबई येथून अशाच प्रकारे कृत्रिम पायातून ड्रग्जची तस्करी केल्याचा मान्य कबूल केले. ही तस्करी करताना कोणाला संशय येऊ नये म्हणून सलमान कृत्रिम पायात ड्रग्ज लपवून वेगवेगळ्या मार्गाने नागपूरात यायचा. कधी तो इंदौर मार्गे तर कधी भूसावळ मार्गे नागपूरात ड्रग्ज घेऊन यायचा, असंही पोलिसांनी केलेल्या चौकशीतून समोर आलं आहे.