पुण्यातील बुधवार पेठ भागात बांगलादेशी अल्पवयीन मुली आणि महिला यांना फसवून आणत त्यांच्याकडून त्यांचे लैंगिक शोषण केल्याचा प्रकार पुन्हा एकदा समोर आलेला असून अल्पवयीन मुलीला पाच महिने एका खोलीत बंद ठेवत तिच्यावर शारीरिक अत्याचार करण्यात आलेले आहे. पीडित मुलीने कशीबशी तिथून सुटका करून घेतली आणि पोलिसात जाऊन मदत मागितलेली आहे
उपलब्ध माहितीनुसार , अल्पवयीन मुलीचे वय सोळा वर्षे आणि दोन महिने असून तिच्या एका मैत्रिणीने तिला फसवत पाच लाख रुपयांना बुधवार पेठेतील ‘आक्का’कडे विकले होते. मैत्रिणीने नोकरी आणि फिरण्याचे आमिष दाखवून तिला बांगलादेशातून नदीमार्गे बेकायदेशीरपणे भारतात आणलं. सुरुवातीला त्या दोघी भोसरी भागात काही दिवस राहिल्या त्यानंतर तिच्या मैत्रिणीने तिला बुधवार पेठ परिसरातील एका कोठेवालीकडे पाच लाख रुपयांना विकले.
आरोपी महिलेनं पीडित मुलीला धमकी देत , “तू बांगलादेशी आहेस, तुझ्यावर पोलिस कारवाई करतील.” असे म्हणत तिला कोंडून ठेवलं आणि त्यानंतर तिला वेश्या व्यवसायास भाग पाडले. सुमारे पाच महिने या अल्पवयीन मुलीवर वेगवेगळ्या व्यक्तींकडून अत्याचार सुरू होते.
अत्याचार सहन करून अखेर तिने योग्य संधी मिळताच ७ एप्रिल रोजी तिथून पळ काढला. बस आणि रिक्षामार्गे ती हडपसरपर्यंत पोहोचली आणि तेथील पोलीस ठाण्यात तक्रार दाखल केली. हडपसर पोलिसांनी प्रकरणाची गंभीर दखल घेत ते फरासखाना पोलिसांकडे वर्ग केले असून या प्रकरणी पोलिसांनी पाच महिलांवर गुन्हा दाखल केला आहे सोबतच एका महिलेला अटक करण्यात आली आहे. प्रकरणाचा तपास वरिष्ठ पोलीस निरीक्षक प्रशांत भस्मे करत आहेत.
