बीड जिल्ह्यातील मस्साजोग गावचे सरपंच संतोष देशमुख हत्याप्रकरणातील मुख्य आरोपी वाल्मिक कराड याचा एन्काऊंटर करण्याची ऑफर मला मिळाली होती, असा सनसनाटी दावा बीडचे निलंबित पोलीस अधिकारी रणजीत कासले यांनी केला आहे.
वाल्मिक कराडच्या बोगस एन्काऊंटरसाठी आपल्याला 5-10 कोटींपासून ते 50 कोटींची ऑफर दिली होती , असेही कासले यांनी म्हटले. रणजीत कासले यांनी हा व्हिडीओ सोशल मीडियावर शेअर केला असून त्यामुळे बीडमध्ये पुन्हा एकदा मोठी खळबळ उडाली आहे. रणजीत कासले हे आधी बीडच्या सायबर विभागात पोलीस निरीक्षक होते. काही दिवसांपूर्वी त्यांना निलंबित करण्यात आले होते.
रणजीत कासले काय म्हणाले?
अक्षय शिंदे प्रकरणात पाच पोलिसांवर गुन्हे दाखल करा, एसआयटी बसवा, अशी बातमी मी टीव्हीवर बघितली. ही एसआयटी बसवून काहीही उपयोग होणार नाही. एसआयटीची बसवायची असेल तर केंद्राची एसआयटी बसवा, तरच यामधून सत्य समोर येईल. मला वाल्मिक कराडच्या एन्काऊंटरची ऑफर देण्यात आली होती. मी म्हणालो, हे पाप माझ्याकडून होणार नाही. 10 कोटी, 20 कोटी, 50 कोटी, अशी वनटाईन ऑफर दिली जाते. तो पोलीस अधिकारी कुठेही असेल तरी त्याला हव्या विभागाला बोलावून घेतले जाते. मी सायबर विभागात होतो. त्यांना माहिती होतं, हा माणूस करु शकतो. याच्यामध्ये दम आहे. मी माझा मोठेपणा सांगत नाही, नाहीतर सोडलेले कुत्रे माझ्या अंगावर भुंकतील.
पोलिसांची चार लोकांची टीम आणि मुख्यमंत्री आणि उपमुख्यमंत्र्यांची गुप्त बैठक होते. बैठकीत विचार केला जातो, काय करायचं. त्यानंतर पाच-सहा जणांची दुसरी विश्वासू लोकांची टीम निवडली जाते, ती घटनास्थळी जाते. जसं अक्षय शिंदेच्या ठिकाणी गेले असतील. एक अधिकारी, दोन अंमलदार, हवालदार, अशी टीम असते. या सगळ्यांना 5 कोटी, 10 कोटी रुपयांची लम्पसम ऑफर दिली जाते. चौकशी झाली तरी आमचं सरकार आहे आम्ही चौकशीतून तुम्हाला मुक्त करु, असे पोलिसांना सांगितले जाते. अशाप्रकारे बोगस एन्काऊंटर होतो, असे रणजीत कासले यांनी म्हटले आहे. अक्षय शिंदे एन्काऊंटर पाठोपाठ विशाल गवळी याचाही तुरुंगात झालेला मृत्यू या निमित्ताने पोलिसांच्या भूमिकेवर प्रश्नचिन्ह सातत्याने निर्माण होत आहे.
